Mkoa unaendelea na juhudi za kufufua zao la kahawa kwa kuweka msukumo katika usimamizi ili zao hili liweze kuwa moja ya zao la biashara katika Mkoa wetu. Juhudi hizi ni pamoja na kuhamasisha wakulima, kutambua maeneo ya kilimo, kuwapatia mafunzo wakulima na wataalam na kuzalisha miche.
Eneo litakalolimwa zao la kahawa
Baada ya kuhamasisha wakulima, makampuni na taasisi, eneo la kiasi cha ekari 3,195.83 kimebainika kuwa kitafaa kulimwa zao la kahawa. Jumla ya wakulima 2,266 na taasisi 9 zitajihusisha katika uzalishaji wa kahawa.
Kazi zilizofanyika
Ili kuhakikisha juhudi za kufufua zao hili zinafanikiwa Ofisi ya Mkuu wa Mkoa ilizielekeza Halmashauri kwenye kikao cha tarehe 10 Januari, 2018 kuanza jitihada za kufufua na jitihadi zilizofanyika ni kama ifuatavyo;
Kuwasilisha taarifa ya nia ya kulima zao la kahawa katika vikao vya mbalimbali vya Halmashauri.
Kuandaa daftari la wakulima wa zao la kahawa.
Kutenga bajeti kiasi cha shilingi 79,000,000 katika mwaka 2018/2019 kwa ajili ya zao hili.
Kuwezesha mafunzo ya kujenga uelewa kwa wakulima 20 na mafunzo ya kujenga uwezo kwa wataalam 19 katika kituo cha Utafiti cha TaCRI Mbimba.
Kuanzisha vitalu kwa ajili ya kuzalisha miche.
Kilimo cha zao la alizeti.
Mkoa umejipanga katika kuhamasisha kilimo cha zao la alizeti kama zao la biashara. Hali ya uzalishaji wa zao la alizeti katika mkoa umebaki kuwa ni wastani wa gunia 6.5 za kilo 65 kwa ekari sawa na tani 1.1 kwa hekta. Tija hii ni ndogo sana ukilinganisha na tija iliyofanyiwa utafiti ya gunia 12-16 kwa ekari sawa na Zaidi ya tani 2.00 kwa hekta
Sababu za kuwa na uzalisha mdogo ni pamoja na :-
Matumizi ya mbegu ambazo hazizalishwa kitalaam,
Uchache wa mbegu bora za zao la alizeti,
Kutotumia mbolea na viutilifu,
Bei kubwa ya mbegu chotara (hybrid) zenye tija kubwa,
Kutolipa umuhimu unaostahili zao la alizeti kama ilivyo kwa zao la mahindi katika mkoa.
Mkakati wa mkoa ni kufikia malengo yafuatavyo:-
Kuongeza tija ya zao la alizeti kutoka 1.1 tani/hekta hadi 2.0 tani/hekta ifikapo mwaka 2020/2021
Kuongeza eneo linalolimwa alizeti kutoka hekta 47,862.1 hadi hekta 200, 000 ifikapo mwaka 2020/2021.
Kuongeza uzalishaji wa alizeti kutoka tani 53,470.5 hadi tani 400,000 kwa mwaka ifikapo mwaka 2020/2021.
Kuongeza ubora wa mafuta, vifungashio na uwezo wa wasindikaji wa mafuta katika mkoa.
Kuongeza matumizi ya mbegu bora (chotara) za alizeti kwa asilimia 50% ifikapo mwaka 2020/2021
Kuongeza idadi ya viwanda vikubwa vya kusindika alizeti kutoka 0 hadi 3 ifikapo mwaka 2020/2021
Mkakati wa kufikia malengo.
Mkakati huu utatekelezwa kwa kuwahusisha wadau mbalimbali waliopo katika Mkoa. Wadau hao ni pamoja na mkulima mmoja mmoja, vikundi vya wakulima, Halmashauri, wasindikaji, makampuni ya pembejeo n.k.
Kupitia jukwaa la alizeti la mkoa kutakuwa na majadiliano ya kina juu ya uendelezaji wa zao la alizeti katika mkoa. Jukwaa hili litawahusisha wakulima, wasindikaji, wasambazaji wa pembejeo na wadau wengine.
Mkakati unawatambua wadau mbalimbali wa alizeti watakaosaidiana na serikali katika kuendeleza zao hili. Wadau hao ni pamoja na SNV, vituo vya utafiti, AMDT, FAIDA MALI na makampuni mbalimbali.
