Sekta ya uvuvi ina mchango mkubwa kwa wananchi wa Mkoa wa Rukwa katika kuwapatia lishe bora, ajira na kipato kwa mwananchi mmoja mmoja na hivyo kuchangia kuondoa umasikini na kukuza pato la Taifa.
Shughuli za uvuvi katika Mkoa hufanyika katika Maziwa mawili makubwa ambayo ni Ziwa Tanganyika na Ziwa Rukwa na kwa kiasi kidogo katika mabwawa mawili ya asili ambayo ni Kwela (Halmashauri ya Wilaya ya Sumbawanga) na Sundu (Halmashauri ya Wilaya ya Kalambo). Kadhalika shughuli hizi za Uvuvi hufanyika katika mito na mabwawa yanayochimbwa na wananchi katika maeneo mbalimbali ya Mkoa.
Katika kipindi cha mwaka 2017/2018 jumla ya tani 2,008 za samaki zenye thamani ya shilingi bilioni 9.8 zilivunwa na kusafirishwa ndani na nje ya Mkoa wetu. Fedha hizi ni mapato ya wavuvi wetu kwenye masoko mbalimbali.
Mikakati ya kuendeleza sekta ya Uvuvi
Ili kukabiliana na Changamoto za sekta ya Uvuvi Mkoa unaendelea kushauri na kuhimiza Halmashauri kutekeleza mikakati ifuatayo:
Kuajiri wataalamu wa Uvuvi, angalau kuwa na Maafisa ugani kwa kila Kata yenye mwalo.
Kutekeleze agizo la OR-TAMISEMI la kutenga fedha 5% ya mapato yatokanayo na Uvuvi kwa ajili kuwezesha kudhibiti Uvuvi haramu katika Maeneo yao na kuendelea kutoa elimu ya uvuvi endelevu
Kuwezesha mazingira bora ya uundwaji wa BMUs na usajili wake na kufanya BMUs zilizopo kufanya kazi kikamilifu kwa mujibu wa Sheria na Kanuni za Uvuvi.
Halmashauri ya Wilaya ya Nkasi kuweka miundombinu ya choo cha umma katika soko la samaki la Korongwe ili soko hilo liweze kutumika kwa malengo yaliyokusudiwa.
Kuendelea kuvutia wawekezaji ili wajenge viwanda vya kuchakata mazao ya uvuvi ili kuyaongezea thamani,
Kuendeleza ufugaji wa samaki katika Mabwawa na katika vizimba ili kuongeza mazao ya Uvuvi na kupunguza utegemezi mkubwa katika maziwa yetu.
Kuhamasisha sekta binafsi kuwekeza katika maduka na zana halali, bora na za kisasa za uvuvi
