imewekwa Tar: October 11th, 2024
Mheshimiwa Mkuu wa Mkoa wa Rukwa, Charles Makongoro Nyerere amezindua zoezi la kujiorodhesha katika Orodha ya Wapiga Kura kwa ajili ya Uchaguzi wa Serikali za Mitaa 2024 Mkoani Rukwa leo Oktoba 11, 2024.
Mheshimiwa Makongoro amejiorodhesha katika Mtaa wa Katandala D, Halmashauri ya Manispaa ya Sumbawanga sawa na ratiba ya Uchaguzi wa Serikali za Mitaa 2024.
Mkuu wa Mkoa amepongeza maandalizi yaliyofanywa na Halmashauri zote za Mkoa wa Rukwa na ametoa wito kwa wananchi kujitokeza kwa wingi kujiorodhesha ili waweze kushiriki kikamilifu katika uchaguzi. Zoezi la kujiorodhesha limeanza tarehe 11 Oktoba 2024 na linatarajia kukamilishwa tarehe 20 Oktoba 2024.
Mkoa wa Rukwa una jumla ya vituo 2,077 vya kujiorodhesha, ambavyo vimegawanyika katika mitaa 165, Vijiji 339, na Vitongoji 1,869.
Uchaguzi wa Serikali za Mitaa unatarajia kufanyika Novemba 27, 2024.
