WAWEKEZAJI KUTOKA ZAMBIA WAVUTIWA NA BANDARI MKOANI RUKWA

imewekwa Tar: May 28th, 2023

Mkuu wa Jimbo la Kaskazini  mwa Zambia  Mhe. Bernard Mpundu ameambatana na viongozi wengine kutoka nchini Zambia katika kushiriki  Kongamano la Uwekezaji Mkoni Rukwa.

Awali Mhe. Mpundu alitembelea katika mabanda ya maonesho ya bidhaa katika viwanja vya Nelson Mandela na baadae katika Bandari ya Kabwe na Kipili kuweza kujionea miundombinu ya bandari hizo.

Baada ya kutembelea na kujionea bandari hizo ameipongeza Serikali ya Jamhuri ya Muungano wa Tanzania katika uwekezaji mkubwa wa bandari zenye kiwango cha Kimataifa Mkoani Rukwa tofauti na nchini Zambia.

Aidha ameipongeza Serikali kwa kutumia wakandarasi  wazawa  katika ujenzi wa bandari hizo na kuwa ujenzi huo unasaidia kuokoa fedha nyingi za Serikali katika kukamilisha miradi mikubwa kama bandari.

Mhe. Mpundu ametoa wito kwa makampuni mbalimbali kutoka Zambia kuja kuwekeza kwenye bandari hizo kwa kujenga meli au boti kubwa za kusafirisha mizigo na abiria kutokana na mahitaji makubwa ya wananchi kutumia vyombo vya maji kwa wingi katika maeneo ya  Kabwe na Kipili.

Kongamano la uwekezaji Mkoani Rukwa limewakutanisha wafanyabiashara kutoka Sehemu mbalimbali zikiwemo ndani na nje ya nchi  lengo likiwa ni kutazama na kutangaza fursa za uwekezaji Mkoani Rukwa. Kongamano hilo lililoanza mnamo Mei 25 2023 linatarajiwa kuhitimishwa  Mei  30 2023.